Saturday, June 9, 2018

സെൽഫി

സെൽഫി
''''''''''''''''''''''''''''''''''''
ഞാനെന്നഭാവത്തെയൂതിക്കാച്ചീടുന്ന
ഞാണിന്മേൽക്കളിയത്രേ സെൽഫി!

എരിയുന്നപ്രാണൻറെ വേദനകാണാത്തൊ-
രെന്നെഞാനാക്കുന്ന സെൽഫി!

'ചന്ദ്രനെപ്പോലെ തിളങ്ങുംവദന'മെന്നെ-
ന്നോടുപൊങ്ങച്ചം വിളമ്പുന്ന സെൽഫി!

മാരണവക്കിലും തലചായ്ച്ചുനിന്നിട്ടെൻ
മരണത്തെ വരവേല്ക്കും സെൽഫി!

ചുംബനക്കാഴ്ചയെടുത്തൊരു നാരിതൻ
'ചാരിത്ര്യം' തകർത്തിട്ടു വിലപേശും സെൽഫി!

ദാരിദ്ര്യഗർത്തത്തിലാണ്ടൊരു ചെറുമനെ
ദയയില്ലാതൊടുക്കുന്ന കാഴ്ചയോ സെൽഫി?

രാഷ്ട്രത്തിൻസമ്പത്തൊന്നൂറ്റിക്കുടിക്കുന്ന
രാഷ്ട്രീയനേതാവിന്നാഘോഷം സെൽഫി!

ജനകീയ നായകനൊപ്പം നിന്നെടുത്താലോ
ഗർവ്വുകൂടുന്നൊരു സവിശേഷം സെൽഫി!
"" "" "" "" "" "" "" "" "" "" "" "" "" "" "" "" "" "" "" "" "" "" "" "
ഗീതാഞ്ജലി 













No comments:

Post a Comment