Thursday, June 7, 2018

കളഞ്ഞുപോയ ശൈശവം

ളഞ്ഞുപോയ ശൈശവം
""""""""""""""""""""""""""""""""
പിഞ്ചിളംകുഞ്ഞിൻറെ പുഞ്ചിരി ചാലിച്ചു
പുലരിയണഞ്ഞെൻറെ ചുണ്ടിൽ പകരുവാൻ

കുഞ്ഞിളംതെന്നൽ കുണുങ്ങിവന്നീടുന്നു
കൊഞ്ചലോടെ വന്നു പഞ്ചവർണ്ണക്കിളി!

ക്രൂരമാം ലോകത്തിൻ വാക്ശരങ്ങളാലേ
കരളിനെ കീറിമുറിച്ചീടുമ്പോളെല്ലാം

കാപട്യമേശാത്ത കുഞ്ഞിൻമൊഴിപ്പൂക്കൾ
കാതര്യമാറ്റുന്നെന്നായുസ്സിൻ വീഥിയിൽ!

നിന്നിൽകിളിർത്തൊരാ നന്മമുകുളങ്ങൾ
നീണ്ടൊരു പന്ഥാവിലെങ്ങു കൊഴിഞ്ഞുപോയ്?

നേരിൻറ നൊമ്പരപ്പാതയിൽ പൂക്കുന്ന
നൈർമ്മല്യമോലുമാ തുമ്പപ്പൂക്കൾ

കണ്ടിട്ടും കാണാതെ പോകുവാൻ നിന്നുടെ
കർണ്ണത്തിലാരോതിയോമനപ്പൂമുത്തേ?

മഞ്ചാടിമുത്തിനാൽ വർണ്ണാഭമായൊരാ
മാകന്ദവാടിയിൽ മാമ്പൂ കൊഴിയുംപോൽ

നിന്നിലെ ശൈശവമെന്നു കളഞ്ഞുപോയ്?
നിഷ്കളങ്കത്തിൻറെ മാധുര്യമെങ്ങുപോയ്?

തേടിയിറങ്ങുക നന്മതൻ മുത്തുകൾ
താവകഹൃത്തിന്നറയിലൊളിപ്പിക്കാൻ!

സ്നേഹം വറ്റാത്തൊരു ദീപപ്രഭപോലെ
സുസ്മേരം വിടരട്ടെ നിൻചുണ്ടിലെന്നാളും!
"""""""""""""""""""""""""""""""""""""""""""""""
ഗീതാഞ്ജലി
14-11-2017

No comments:

Post a Comment