Tuesday, February 26, 2019

ഒരു കന്യാസ്ത്രീയുടെ നിയോഗം

ഒരു കന്യാസ്ത്രീയുടെ നിയോഗം
''''''''''''''''''''''''''''''''''''''''''''''''''''''''''''''''''''''''''''''''''''''
ദൈവത്തിൻ തിരുമണവാട്ടിയായി
നിത്യകന്യകയായി വാഴേണ്ടവളല്ലോ

ലജ്ജിതയായി മാറിയിന്നൊരുനാളിൽ
ഒരു പുരോഹിതൻറെ വിഴുപ്പുമായ്!

മൗനഭഞ്ജനത്തിനു ശക്തിയാർജ്ജിച്ചവൾ
പുരുഷമേധാവിത്വത്തിന്നെതിരെയെങ്കിലും

ന്യായവും നീതിയും  വിറപൂണ്ടിതാ 
ശ്വാസം ലഭിക്കാതിരുളിൽ വീഴുന്നു!

ഉയർപദവിയുള്ളോൻ കുറ്റവാളിയെന്നാലോ
കുറ്റം തിരയുന്നീ സാധുവാം നാരിയിൽ

ദുസ്സ്വഭാവത്തിൻ നിറംപിടിപ്പിച്ച കഥകൾ
പരത്തുന്നു നാട്ടിൽ കവലകളിൽ നീളേ

മതങ്ങൾ നിയന്ത്രിക്കും ഭരണകൂടങ്ങൾക്ക്
വാളുയർത്താനാവില്ല മതാധികാരിക്കെതിരേ

നീതിദേവതയും മിഴിപൂട്ടിനിന്നീടവേ
ആരുണ്ടിവിടെയീ കന്യയെ രക്ഷിപ്പാൻ?

ക്രിസ്തുവില്ല,ക്രിസ്തുശിഷ്യരില്ല,വചനം
ചൊല്ലിനടക്കുന്ന കുഞ്ഞാടുകളുമില്ല

എല്ലാരുമൊന്നായി അഭിഷിക്തയാക്കുന്നു
പൊള്ളുന്ന വാക്കുകളാലബലയാമവളെ

ഇനിയെങ്കിലും തുറക്കൂ  സഭാതലവരേ മിഴി
'അഭയ'യ്ക്കഭയമരുളാത്ത നീതിജ്ഞരേ

നിങ്ങൾതൻചെയ്തികൾക്കായൊരു ഫലമോ
നിങ്ങൾക്കായി കാത്തിരിക്കുന്നപരജഗത്തിൽ!
'''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''
ഗീതാഞ്ജലി
4-8-2018



No comments:

Post a Comment