Tuesday, March 26, 2019

മാ നിഷാദ

മാ നിഷാദ
"" "" "" "" "" "
മമഹൃദയമിത്രമേലിന്നിതാ കേഴുന്നു
അനവരതമിറ്റുന്നു കണ്ണീരിൻ  മുത്തുകൾ!

കരുണയുടെ ചാലുകൾ വറ്റിയോ നിന്നിലെ
പരിഗണനയില്ലയോ സഹജീവിയെന്നും

നിരസനമതോ നിൻ പ്രണയാഭ്യർത്ഥനതൻ
പകരമതു ചോദിക്കുവാൻ  കൊലയോ വഴി?

പെരുവഴിയിലിട്ടെന്നെ കത്തിച്ചു നീയെന്നിൽ
മരണഭയമുളവാക്കുന്നതോ പ്രണയം?

പരവശതയേതുമേയില്ലാതെ  നിന്നു നീ
മനമതിലൊരു കുറ്റബോധവുമേശാതെ?

കനവതിലുമൊരുനാളും ഞാനോർത്തതില്ല
കരുണയൊഴിയും പ്രതികാരദാഹി നീയോ?

പറയുവതിനാവതില്ലവസാനയാത്രാ-
മൊഴിയുമിനിയെന്നാത്മാവിൻതേങ്ങലല്ലാതെ

മമഹൃദിയുമിന്നിതാ വെന്തുപോയഗ്നിയിൽ
കഠിനതരമല്ലോ നിൻ ഹൃത്തെന്നറിയുകിൽ

ധരയിലൊരു മാനുഷനുമാത്രം സാദ്ധ്യമോ
കരുണയുടെ വറ്ററ്റു ക്രൂരത കാട്ടുവാൻ?
"" "" "" "" "" "" "" "" "" "" "" "" "" "" "" "" "" "" ""
ഗീതാഞ്ജലി
21-3 - 2019

No comments:

Post a Comment