അർബുദം

അർബുദം
'' '' '' '' '' '' '' ''
വേദന  തിങ്ങുന്നൊരാത്മാവിൻ നൊമ്പര-
മാരുമേ കാണാതെ തേങ്ങീ

ദേഹവും ദേഹിയും നീറിപ്പുകയുന്നു
അർബുദം കാർന്നതിൽപ്പിന്നെ

ആശ്വാസമില്ലാതെ ആശയുമറ്റിന്നു
ദു:ഖത്തിൻ മാരിയിൽ പ്രാണൻ

പൊലിഞ്ഞീടാനായി  നേരവും കാത്തിതാ
മിഴിപൂട്ടി നില്പൂ ചെമ്മേ

രോഗത്തിൻ കാർമേഘജാലത്താൽ മൂടവേ
എൻദേഹമെനിക്കു ഭാരം

കേശമൊഴിഞ്ഞൊരെൻ  ശിരസ്സിൽ കൈചേർത്തു
കാലനെ കാത്തിരിക്കുന്നൂ

അവസാനശ്വാസം  പോകുവാൻ കാക്കവേ
വിട്ടൊഴിഞ്ഞീടുമോ ക്ലേശം

വൈദ്യന്മാരൊന്നായി കൈമലർത്തീടവേ
എന്തിനു വേണ്ടിയീ ജീവൻ

അണയുംമുമ്പിലായാളുന്ന ദീപമായ്
നർത്തനമാടുന്നീ ഭൂവിൽ?

എങ്കിലും പുഞ്ചിരിപ്പൂവണിഞ്ഞധരം
സുഖമെന്നു മാത്രം ചൊല്ലീ

സ്വാന്തനിപ്പിച്ചീടാൻ വന്നണഞ്ഞോരോടു
കളിവാക്കു ചൊല്ലീ ചേലിൽ

നീർമിഴി നിറഞ്ഞൊഴുകാതെ നോക്കീടാം
എന്നെ സ്നേഹിപ്പവർക്കായ് ഞാൻ
'' '' '' '' '' '' '' '' '' '' '' '' '' '' '' '' '' '' '' '' '' '' '' '' '' '""
ഗീതാഞ്ജലി
12-6-2019