കൊറോണക്കാലത്തെ വിഷു

 കൊറോണക്കാലത്തെ വിഷു

"" "" "" "" "" "" "" "" "" "" "" "" "" "" ""
പ്രകൃതിയൊരുങ്ങിയൊരു വിഷുവിനായ്
പ്രഭാതം ചിരിതൂകിനിൽപ്പതുണ്ടേ
കണിക്കൊന്ന മഞ്ഞയിൽ മുങ്ങിക്കുളിച്ചു
കടക്കണ്ണെറിഞ്ഞുനിരന്നിടുന്നുണ്ടേ

എങ്കിലും വിഷാദച്ഛായയോ മർത്ത്യരിൽ
എങ്ങനെ കൊണ്ടാടീടുവാനീ വിഷു
പകർച്ചവ്യാധിതൻ പിടിയിലായ് പിടയുന്നു
പകച്ചുനിൽക്കുമീ ലോകമെമ്പാടുമേ

ലോകത്തിലാകവേ ഇരുൾ മൂടിനിൽക്കവേ
രോഗം പരത്തുന്ന അണുവിനാലിന്ന്
പിടഞ്ഞിതാ വീഴുന്നു മരണഗർത്തത്തിൽ
പിടയുന്ന നെഞ്ചകമാശകൾ തീരാതെ

ആഘോഷിച്ചീടുവാനാവാതെ വിഷുവും വിതുമ്പി
ആരവങ്ങളില്ലാതൊഴിഞ്ഞുപോയ്
കണിക്കൊന്ന പുഞ്ചിരി തൂകി നിർമ്മലമായ്
കഥയൊന്നുമറിയാതെയാലോലമാടി

വിഷുപ്പക്ഷി പാടുന്ന പാട്ടിൻറെ ശ്രുതി കേൾക്കേ
വിഷാദമകലുമോ മനുജഹൃത്തിൽ?
പരസ്പരമകന്നുനിന്നിടുമീ ദിനങ്ങളിൽ സാന്ത്വനം
പകരുവാനണയൂ നീ വിഷുക്കാലസന്ധ്യേ
"" "" "" "" "" "" "" "" "" "" "" "" "" "" "" "" "" "" "" "" "" "
ഗീതാഞ്ജലി
15-4-2020
**********************************************