കേരളപ്പിറവി

 കേരളപ്പിറവി

***************
കേരളപ്പിറവിയൊന്നുകാണുവാൻ
രാഗമോടെ വരുമീ ദിനം ശുഭം
കേരളത്തെ മധുരം പകർന്നിതാ
സ്വീകരിച്ചിടുകയിന്നു സോദരേ

കോമളം കലകളാൽ നിറഞ്ഞൊരാ
കേരളക്കരയിലൂടെയെൻ മനം
യാത്ര ചെയ്തിടുവതൊന്നു കാണുവാൻ
ഭംഗിയാർന്നൊരുടലൊന്നു പുൽകുവാൻ

സഹ്യസാനുവിനു മാലയാകുവാൻ
സന്തതം പുഴകളുൾക്കുളിർ തരും
പാടവും കതിരുചൂടി നിൽക്കവേ
ചൂടുമീ തരുലതാദി ഹർഷവും

നിസ്തുലപ്രഭ പരത്തുമർക്കനായ്
ചൂടുവാൻ ഹരിതഭംഗിയോടെയീ
ഭൂവുണർന്നു പുളകം തരുന്നുടൽ
ചാരുവായണിയു പുഷ്പവൃന്ദവും

വാദ്യമേളമൊടു നർത്തനങ്ങളാൽ
കേളികൊട്ടുണരുമീ ദിനം വരം
കേരളീയരുടെ ഹൃത്തിലെന്നുമീ
നാടു വാഴുമെ ഗൃഹാതുരത്വമായ്

ഗീതാഞ്ജലി
1-11-2025
വൃത്തം:രഥോദ്ധത
ലക്ഷണം:രംനരം ലഗുരുവും രഥോദ്ധതാ
താളം:തംതതം തതത തംതതം തതം
*******************************************