ഓണം നാടൻപാട്ട്

ഓണം നാടൻപാട്ട്
"" "" "" "" "" "" "" "" "" "
ഓണം വന്നോണം വന്നേ 
മാണിക്കച്ചെമ്പഴുക്ക
ഓണം വന്നോണം വന്നേ 
പുഞ്ചിരിപ്പൂക്കളായീ
ഓണം വന്നോണം വന്നേ
പ്രിയമാനസ്സരിൽനിന്നും
ഓണം വന്നോണം വന്നേ
ആശംസാപ്രവാഹമായ്
ഓണം വന്നോണം വന്നേ
മമമാനസ്സച്ചെപ്പിന്നുള്ളിൽ
ഓണം വന്നോണം വന്നേ
നാടൻകളിപ്പാട്ടായ്
ഓണം വന്നോണം വന്നേ
സമ്പൽസമൃദ്ധിയുടെ
ഓണം വന്നോണം വന്നേ
സാഹോദര്യത്തിൻറെ
ഓണം വന്നോണം വന്നേ
പൂക്കളമൊരുക്കീ ഞാൻ
ഓണം വന്നോണം വന്നേ
ഹൃത്തിൻ മണിമുറ്റത്തും
ഓണം വന്നോണം വന്നേ
തിരുവോണാശംസകൾ
ഓണം വന്നോണം വന്നേ
നേരുന്നേവർക്കും ഞാൻ
ഓണം വന്നോണം വന്നേ
സ്വാദിഷ്ഠമായൊരു
ഓണം വന്നോണം വന്നേ
സദ്യയൊരുക്കീടാമേ!
ഓണം വന്നോണം വന്നേ
വന്നീടുകെല്ലാരുമേ
ഓണം വന്നോണം വന്നേ
പാട്ടുംമേളവുമായ്!
''''''''''''''''''''''''''''''''''''''''''''''''''''''''''''''''''''''''
ഗീതാഞ്ജലി
🌻🌻🌻🌻🌻🌻🌻🌻
4-9-2017

പുനർജ്ജന്മം

ഇനിയുമൊരുജന്മമുണ്ടാകിലന്നു
ജനിക്കണമൊരുമിന്നൽപ്പിണരായി
ഹനിക്കണം തമസ്സിൻശക്തികളെ
ഹസിക്കണം പാഴായമുജ്ജന്മമോർത്ത്

നിറയ്ക്കണം മാരിയാൽ ഭൂവിൻഹൃത്തിടം
കുതിർക്കണം കുളിരാൽപ്രപഞ്ചത്തെ
ജ്വലിക്കണം ദ്യുതിയായിരുണ്ടപാതയിൽ
കനിയണം നേരിൻതെളിനീരിടങ്ങളിൽ

മറയ്ക്കണം ദു:ഖത്തിൻകാർമേഘത്തെ
മറക്കണമകന്ന സ്നേഹനാട്യങ്ങളെ
നിറയ്ക്കണംചിരിയാൽഗഗനാനനം
കരിക്കണം പോയജന്മസ്മൃതികളെ

ഗർജ്ജിക്കണമനീതിയ്ക്കെതിരെയന്നും
തകർക്കണംപ്രതികാരക്കോട്ടകളെ
ഉടയ്ക്കണം ഹിംസതൻ ഖഡ്ഗങ്ങളെ
നിവർത്തണംഭീതിയാൽവളഞ്ഞനട്ടെല്ലുകൾ!

തെളിയണമൊരാശ്വാസനാളമായ്
ഒഴുകണംവറ്റിയകണ്ണീരുപ്പുപാടങ്ങളിൽ
അണയണമൊരുകിളിതൻകൊക്കിൽ
നിറയ്ക്കണം നീർത്തുള്ളിയാൽ പ്രാണനിൽ !

തെളിക്കണംദ്യുതിയുള്ളുപൊള്ളുമ്പോളും
ഭജ്ഞിക്കണം ഭയത്തിൻമൗനങ്ങളെ
എതിർക്കണംഗർവ്വിൻപേക്കൂത്തുകളെ
പതിക്കണം ചാരമായിമണ്ണിൻമാറിൽ!

⚡⚡⚡⚡⚡⚡⚡⚡⚡⚡⚡⚡⚡⚡⚡

ഗീതാഞ്ജലി
25-9-2017

യാത്രാമൊഴി

യാത്രാമൊഴി
"" "" "" "" "" "" ""
ദു:ഖത്തിൻ പാലാഴി നീന്തിത്തളരാനായ്

ദൈവങ്ങളേകിയെനിക്കൊരു ജന്മം

കണ്ണുനീർമുത്തുകൾ പുഞ്ചിരിനൂലിനാൽ
കെട്ടിയൊരുക്കി ഞാനൊരുകണ്ഠഭൂഷ!

അശ്രുവിൻ പനിനീരുകൊണ്ടു നനഞ്ഞു
അഴകുവിരിയിക്കാനെൻ കപോലം

മത്സരിച്ചെൻ കൂട്ടരൊത്തൊരുമിച്ചവർ
മർത്ത്യരായി പാരിൽപ്പിറന്നോരല്ലോ!

കാർമേഘച്ചുരുളുകളായിരമായിരം
കാർക്കശ്യമോടെയിളകിനീങ്ങി

വിങ്ങിവിതുമ്പിപ്പെയ്തുതോർന്നിട്ടിതാ
വിണ്ണിടംവിട്ടു പതിച്ചുഭൂവിൽ!

പെയ്തുതോരാത്ത മിഴിയുമായീയാത്ര
പെരുവഴിയിലൂടിനിയെന്നുമെന്നും

തുടരുന്നു ഞാനിതാതളരാതെയേകയായ്
തുടരുക നിങ്ങൾതൻകല്ലേറുകൾ

ഒട്ടും പതറാതെ ജീവിതപന്ഥാവിൻ
ഒറ്റയടിപ്പാതയൊറ്റയ്ക്കു താണ്ടവേ

ഉപജാപംചെയ്തുപതാപമേറ്റീട്ടൊ-
ന്നുപദേശകരായി നടിച്ചവർതൻ

പിൻവിളിയെൻ കാതിൽ മുഴങ്ങീടുകവേണ്ട
പിന്നിലേയ്ക്കില്ലിനി കാൽവെയ്പ്പുകൾ.

വേഷങ്ങൾ ദിനംതോറുമാടിത്തകർക്കുന്നോർ
വിഷംപുരട്ടീടുന്നോർ പുഞ്ചിരിയിൽ

യാത്രാമൊഴിയൊന്നു നേരുകവേണ്ടിനി
യാന്ത്രികമാമൊരു മന്ത്രണംപോൽ!

പാൽനിലാപ്പുഞ്ചിരിതൂകി വഴികാട്ടും
പനിമതിതൻനന്മവെളിച്ചംമതി

പാതയിൽ സ്നേഹത്തിൻ പൂക്കൾ വിരിച്ചീടും
പേരറിയാത്തരുവിൻറെ തണലും മതി

ഒരുകുളിർക്കാറ്റിൻറെ കേശത്തിൽ  ചൂടീടാ-
നൊരുക്കട്ടെ നീറുന്നെന്നോർമ്മപ്പൂക്കൾ

കളകളമൊഴുകുന്നോരരുവിതനന്നോളങ്ങൾ
കളിപറഞ്ഞെന്നോടു ചിരിച്ചീടുമ്പോൾ!
''''''''''''''''''''''''''''''''''''''''''''''
ഗീതാഞ്ജലി
28-9-2017

പാഠങ്ങൾ

പാഠങ്ങൾ നല്ലതേതെന്നറിയുവാൻ 
പാഠങ്ങൾ പഠിച്ചുൾക്കരുത്താർജ്ജിക്കാൻ 
പാഠങ്ങൾ ജീവിതാന്ത്യംവരെ നേടാന്‍ 
പാഠങ്ങൾ സ്നേഹത്തിൻവിത്തുവിതച്ചീടാൻ 
പാഠങ്ങൾ സുരഭിയായന്യർക്കും പകരാന്‍ 
പാഠമായിമാറി മാതൃക കാട്ടുവാൻ
പാഠങ്ങളറിയവേ വിനയംകൈവന്നീടാൻ
പാഠംപഠിക്കാൻ തുടങ്ങാമീദിനമതില്‍!

🎵🎵🎵🎵🎵🎵🎵🎵🎵🎵🎵🎵🎵🎵🎵
📚📖📚📖📚📖📚📖📚📖📚📖📚📖📚
വിജയദശമിദിനാശംസകൾ!
ഗീതാഞ്ജലി

ഹേ റാം!..........

ഹേ റാം
"" "" "" ""
'ഹേറാം'മന്ത്രണമാർത്തനാദമായൊരാനാളിൽ
ഹേതുവായതൊരു മതഭ്രാന്തനാലല്ലോ!
വീണൊരു മഹാത്മാവതു ചൊല്ലിപ്പിരിയവേ
വിണ്ണും തേങ്ങിയൊരു മഹാനഷ്ടമോർക്കവേ! 
ഒരു നന്മമരമല്ലോ വേരറ്റുവീണൂ
ഒരു രാഷ്ട്രത്തിന്നാത്മാവെരിഞ്ഞടങ്ങിയോ?
കാശ്മീർ മുതൽ കന്യാകുമാരിവരേയും കാർമേഘപടലംപോലാവരണംചെയ്യും അഴലിന്നിരുൾമൂടിയടിതെറ്റിവീഴവേ
അലയടിച്ചൊരു ദു:ഖക്കടലായിമാറി രാഷ്ട്രവും!
ശോകക്കടലിലൊരു സൂര്യൻ നിപതിച്ചീടവേ ശോണിമകലർന്നുള്ളങ്ങൾ വിങ്ങിവിതുമ്പി 
രാഷ്ട്രത്തിന്നാത്മാവിതാ തേങ്ങുന്നുയിന്നും
രാപ്പാടിയായി 'ഹേ റാ'മെന്നു മനമിടറി!

കർക്കടകമാസത്തിലണമുറിയാതെ
കനത്തമഴയ്ക്കൊപ്പമെത്തും തത്ത്വചിന്തകൾ!
ക്രൗര്യമെഴും വേടൻറെ ശരമേറ്റതാം
ക്രൗഞ്ചപ്പക്ഷിതൻ നിലവിളിയിന്നുമുയരുന്നു
ഉണരുന്നില്ലൊപ്പം 'മാ നിഷാദ' ബധിരർതൻ കാതിൽ
ഉണർത്തുപാട്ടായതെന്നും പ്രപഞ്ചത്തിൽ പ്രതിദ്ധ്വനിച്ചീടും! എരിഞ്ഞടങ്ങാക്കോപമുള്ളിൽ നിറച്ചു വേടന്മാർ
എഴുതുന്നു നൂതനഭീകരകാവ്യം ആഹ്വാനംചെയ്യുന്നു
തൻസോദരരുടെ രുധിരമൂറ്റുവാൻ 'ഹേ റാം'വിളിയുമായിതാ  രാവണരിവിടെയാടിത്തകർത്തിടുന്നല്ലോ സീതമാരിന്നുമഗ്നിശുദ്ധിക്കിരയാകേ
ഭൂമിപുത്രിമാരാർത്തലച്ചു തലതല്ലുന്നിവിടെ
പുതിയ ലക്ഷ്മണരേഖകളിവിടിടെയൊരുക്കീടും
പാരതന്ത്ര്യത്തിൻ ചങ്ങലകൾ സ്വതന്ത്രനാട്ടിലും!
വേടന്മാരിവിടെ ബാലസീതമാരെയും
വിരിയുംമുമ്പേ ദലങ്ങളൂർത്തു, പിച്ചിച്ചീന്തുന്നു. ആദികവിയുടെയാത്മാവുമതു ശ്രവിച്ചിന്ന്
ആഘാതംപൂണ്ട മനവുമായി കേഴുന്നു 'ഹേ റാം"!

വിദ്വാന്മാർ സത്യധർമ്മച്ചിറകുകളരിയേ
വിസിൽമുഴക്കികൾ സ്ഥാനഭ്രഷ്ടരായി ശരശയ്യയിലോ? മണ്ണിൽപ്പണിയുവോരെ കടക്കെണിയിലാഴ്ത്തുന്നു
മുഷിഞ്ഞു ജനവും ഭക്ഷണത്തിനും വിലക്കു വീഴുമ്പോൾ. ആൾദൈവങ്ങളാശ്രമകന്യകളെത്തേടവേ
ആടുന്നു മരത്തിൻചില്ലകൾ പണക്കിലുക്കത്താൽ
ഭക്തിയാലേ ഭക്തർതൻ തലച്ചോറു ബന്ധിപ്പോർ
ഭക്തി വിറ്റു, വൻസാമ്രാജ്യമുയർത്തിടുന്നല്ലോ!
പിഞ്ചുബാലകർ ശ്വാസമില്ലാതുടഞ്ഞുവീഴുമ്പോൾ ആതുരാലയങ്ങളിലതിശയം നടത്തീടില്ലിവർ! ശീതീകരണമുറികളിലടച്ചു ശിഷ്യരെ
ശൈത്യത്തിൻ മരവിപ്പു ബുദ്ധിയിലേറ്റി
പ്രതികരിച്ചീടാത്ത തലമുറയെ വാർത്തീടാൻ
ആഭാസവിദ്യാഭാസമിന്നും തുടരുന്നു! മാനുഷികമൂല്യങ്ങളന്യമായിത്തീരുമ്പോൾ
മാനവർ നേടിയതനർത്ഥമാം വിദ്യ.
സാക്ഷ്യപത്രവുമായവരലയേ തെരുവിൽ സമ്പന്നനിടവഴിയിലൂടനർഹവേദിയിൽ!
തേങ്ങുന്നിവിടെ നീതിക്കായിപ്പടവെട്ടിയോർ
തേങ്ങുന്നു രക്തസാക്ഷികൾതൻ മാതാക്കൾ!
ആശയങ്ങളെ ഭയന്നീടുംഭീരുക്കളല്ലോ
ആശിച്ചീടുന്നു കബന്ധമാലയണിഞ്ഞിടുവാനായ്!

എങ്കിലുമിവിടെയുണ്ടാവുമോ ഗാന്ധിയർ
എന്നോടുകൂടെ പ്രതികരിക്കുവാൻ ഭയലേശമന്യേ
പിടഞ്ഞുവീഴുമ്പോളും വെടിയേറ്റൊരു നാളിൽ പിളർന്നിടാത്തൊരാത്മധൈര്യം ജീവനിൽ നിറച്ചു സത്യത്തിന്നിടിമുഴക്കമായിമാറിടുമ്പോളും
സ്നേഹം വെറുപ്പിനു വഴിമാറാതിനിയും
വിളിച്ചീടാം 'ഹേ റാ'മിന്നു പണിതൊരുക്കീടാൻ വിശ്വസ്നേഹത്തിന്നടിസ്ഥാനശിലകൾ!
 ''''''''''''''''''''''''''''''''''''''''''''''''''
ഗീതാഞ്ജലി
2-10-2017