ചമയം

 ചമയം

"" "" "" ""
ജീവിതനാടകത്തിലണിഞ്ഞ ചമയങ്ങൾ
വേണ്ടിനിയഴിച്ചിതാ വച്ചിടുന്നവ മേലിൽ
ബാല്യവും യൗവനവുമാടിത്തകർത്തിടവേ
പോയൊരാ വർഷങ്ങളേ, വിട ചൊല്ലിടുന്നു ഞാൻ

സ്നേഹവും സഹനവുമലങ്കാരങ്ങളായി
ജീവിതവേദിയിതിലണിഞ്ഞു മോദമോടെ
ദുഃഖവും വേദനയുമണിഞ്ഞു ചിലങ്കയായ്
താങ്ങാനാവാതെ തളർന്നൊടുവിൽ വീണിടുന്നു

പോയിമറഞ്ഞു കാലയവനികയ്ക്കുള്ളിൽ 
കൂടെക്കളിച്ചവരോ പലരും മിന്നൽപോലെ
മുഗ്ദ്ധമാം മോഹങ്ങളാം സൂനങ്ങൾ ചൂടിടവേ
കേശത്തിൽനിന്നൂർന്നിതാ കൊഴിഞ്ഞുപോയിടുന്നു.

വാർദ്ധക്യമെത്തിടവേ ചമയമഴിക്കുവാൻ
നേരമായെന്നു ലോകം ചൊല്ലിയെൻ കാതിൽ മെല്ലേ
പിൻവാങ്ങുന്നു ഞാനും നീറുന്നയോർമ്മയുമായ്
വൃദ്ധസദനത്തിൽ വേദിയൊരുക്കിടാമിനി.
"" "" "" "" "" "" "" "" "" "" "" "" "" "" "" "" "" "" "" "" "" "" ""
ഗീതാഞ്ജലി
30-11-2020

വിരഹം

 

വിരഹം
"" "" "" "" ""
വരുമോ ഇനി പോയ കാലമേ
തരുമോ പലയോർമ്മതൻ ഹരം
മറയും നിറമാർന്ന സന്ധ്യകൾ
വരുമോ പുതുശോഭയേകി നീ?

അരികിൽ വരുമെന്നു ചൊല്ലി നീ
പിരിയുംദിനവും മറഞ്ഞുപോയ്
വിരഹം മമ ജീവതന്ത്രിയിൽ
തെളിയും പല ശോകതാളവും

കൊതിയേറവെയൊന്നു കാണുവാൻ
മനതാരിലെ ഭൃംഗമൊന്നിതാ
ഉയരുന്നനുരാഗപൂർവ്വമായ്
കനവിൽ വിരിയും സുമത്തിനായ്

ഇനിയെന്നു വരും പ്രിയംവദേ
മമചാരെ വിരുന്നുവന്നിടാൻ
തിരയായൊരു ശോകമാറ്റുവാൻ
പുണരൂ ഹൃദി വെണ്മ തൂകുവാൻ

തുടരുംവ്രതമോടെ കാത്തു ഞാൻ
തളരുംതനു താങ്ങിനിന്നിടാം
മിഴിയിൽ നിറയും ഝരത്തിനാ-
ലലകൾ തഴുകട്ടെ ജീവനിൽ
(വൃത്തം - സുമുഖി)
"" "" "" "" "" "" "" "" "" "" "" "" "" "" "" "" "" ""
ഗീതാഞ്ജലി
6-12-2020

 

എന്റെ കേരളം

 എന്റെ കേരളം

"" "" "" "" "" "" "" "" 

പ്രകൃതിസുന്ദരം നാടിതല്ലയോ 

ഹരിതമെന്നുമേ എൻറെ കേരളം

നദികളേകുമീ മുഗ്ദ്ധയൗവനം

നയനകൗതുകം  കാന്തിപൂരിതം

നിരനിരന്നിടും കേരവൃക്ഷവും 

കതിരൊരുക്കിടും പാടശേഖരം  

തരുലതാദികൾ  നൃത്തമാടുമീ

തരളഗാത്രിയാണെൻറെ കേരളം

നിളയൊരുങ്ങുമീ തീരഭൂമിയിൽ

ജലതരംഗമായ്  നൃത്തമാടിടും

തെളിയുമോർമ്മയിൽ  കായലോരവും

കുളിരുകോരിടുംനാടിതല്ലയോ

മധുരമേറുമീ ഭാഷയൊന്നിതാ

അഴകൊരുക്കിടും ഭൂഷണം സദാ 

കലകളായിരം ചേർന്നുനിന്നിടും  

കവനഭംഗിതൻ  ദേശമല്ലയോ

കഥകളിപ്പദം ചൊല്ലിയാർദ്രമായ്

നടനവൈഭവം  പേരുകേട്ടിടും

ലളിതഗാനവും ചെണ്ടമേളവും

പ്രിയതരം മുദാ  കേട്ടുകൊള്ളുവിൻ     

അഭിരമിച്ചിടാനോണനാളിലായ്

നടനമാടുവാൻ നാരിമാർ വരും

വിഭവമൊക്കെയും  ചേർന്ന സദ്യതൻ

രുചിയറിഞ്ഞിടാമോണമെത്തിയാൽ 

ഒരുമയോടെ നാം കൈവരിച്ചിടാം

പെരുമയെന്നുമേ കൈരളിക്കിതാ

തെളിയുമാർദ്രമാം  ദീപമായിതാ

തുടരുകെന്നുമേ എൻറെ കേരളം

(വൃത്തം - സമ്മത) 

"" "" "" "" "" "" "" "" "" "" "" "" "" "" "" "" "" "" 

ഗീതാഞ്ജലി

28-11-2020

കടലാസുവഞ്ചി

 

കടലാസുവഞ്ചി
"" "" "" "" "" "" "" ""
ഉണ്ടെനിക്കു കടലാസ്സുവഞ്ചിയാ
ബാല്യകാലനദിയിൽ തുഴഞ്ഞിടാൻ
പാഞ്ഞിടുന്നു പിറകോട്ടിതോർമ്മകൾ
കാറ്റുപോലെയലയുന്നു  ചിന്തകൾ.

കൂട്ടരൊത്തുകളിയാടിടുന്നൊരാ
നാളുകൾ തിരികെ വന്നുവെങ്കിലോ
കുട്ടിയായി, കളിവഞ്ചിതന്നിലായ്
കാഴ്ച കണ്ടു, തുഴയുന്നതോർപ്പു ഞാൻ.

ബാല്യകാലമൊരു ഹർഷഗീതമായ്
തേടിവന്നു മമ ജീവവേണുവിൽ.
താളമിട്ടുവരുമോർമ്മകൾ തരും-
ഹ്ലാദമൊന്നു പകരേണ്ടതെന്നുമേ

പെയ്തുതോർന്ന മഴയത്തു കൂട്ടുകാർ
ചേർന്നൊഴുക്കി കടലാസുവഞ്ചികൾ.
മത്സരിച്ചു മമ വഞ്ചിയും തുഴ-
ഞ്ഞെത്തുവാൻ വളരെ വാഞ്ഛയോടെ ഹാ!

വിണ്ണിലോടിയലയും  ഘനങ്ങളാം
നാരിമാർ മുടിയഴിച്ചുതുള്ളവേ
മുങ്ങിയെൻറെ കടലാസുവഞ്ചിയും
മുങ്ങി ഞാനുമൊരു ദുഃഖഗംഗയിൽ.

ആ ദിനങ്ങളിനിയും വരുന്നതും
കാത്തുനില്പു മമ മാനസം വൃഥാ.
ജീവിതം തുഴയവേ തളർന്നിടും-
നേരമീ മധുരമോർമ്മകൾ വരം. 
(വൃത്തം - രഥോദ്ധത)
"" "" "" "" "" "" "" "" "" "" "" "" "" "" "" ""
ഗീതാഞ്ജലി
8-11-2020

സ്നേഹദൂതൻ

സ്നേഹദൂതൻ
"" "" "" "" "" "" "" ""
പ്രപഞ്ചമാകെയും
പ്രകാശമേകുവാൻ
പുൽത്തൊട്ടിലിൽ 
പിറന്നു സ്നേഹദൂതൻ

പാപത്തിലാഴ്ന്നൊരു
ലോകരെ രക്ഷിക്കാൻ
സ്നേഹത്തിന്നവതാരമായ്
ജാതനായ് പാരിതിൽ

കിഴക്കുദിച്ചൊരു താരം
വിളംബരം ചെയ്തീ ജനനം
വഴികാട്ടി രാജാക്കന്മാരെ
തിരുസന്നിധിയിലെത്താൻ.

ആഘോഷിച്ചിടാമീ ജനനം
സ്നേഹദൂതൻറെ ജനനം
വിശ്വസ്നേഹത്തിൻറെ
മാതൃകയായി മാറിടാം
"" "" "" "" "" "" "" "" "" "" "" "" ""
ഗീതാഞ്ജലി
25-12-2020

 

  

 

 

വരവേല്പ്

 വരവേല്പ് 

"" "" "" "" "" 

താരകജാലമതാ തിരി താഴ്ത്തി,
ഭാസ്കരനെത്തിയ പാതയിലിന്നും
മോഹനരൂപിണിയീ പുതുവർഷം
വന്നിടുമോ ഒളിതൂകിടുവാനായ്?

പൊൻനിറമാർന്നിതു സുന്ദരവാനം
കോകിലകൂജനമെങ്ങുമുണർന്നു.
സ്വാഗതമോതിടുവാൻ സുമജാലം
വർണ്ണവിരുന്നു നിറച്ചിതു പാരിൽ.

കാതരമാമൊരു നീള്‍മിഴി നീട്ടി,
വ്യാധിയണഞ്ഞിഹ പോയൊരു വർഷം
നീറുമൊരോർമ്മയുമായുണരുന്നു
ഭീതിയുയർത്തിടുവാനൊരു രോഗം

നീങ്ങിടുമോ ദുരിതം പുതുവർഷം
വന്നിടുമോ ദ്യുതി ലോകമിതെങ്ങും?
ശാന്തി പരന്നിടുമെന്നൊരു തോന്നൽ
മാനസവാടിയിലാശയുണർത്തി

കാന്തിയെഴുന്നൊരു ഹാസമിതെങ്ങും
ചാർത്തിടുവാൻ  വരവേല്പിനൊരുങ്ങാം
വർണ്ണമനോഹരദൃശ്യമതെങ്ങും
തങ്ങിടുവാൻ പുതുവർഷദിനത്തിൽ
(വൃത്തം - ദോധകം)
"" "" "" "" "" "" "" "" "" "" "" "" "" "" "" "" "" "" ""
ഗീതാഞ്ജലി
31-12-2020

ഓണപ്പൂക്കളം

 

ഓണപ്പൂക്കളം
"" "" "" "" ""
പൂവേ പൊലി പൂവേ പൊലി
പൊന്നോണപ്പൂക്കളമിടാൻ
പൊന്നോമനകളെയോടിവാ
പൂക്കൂടയിങ്ങു കൊണ്ടുവാ

ചെത്തിപ്പൂവും തുമ്പപ്പൂവും
മന്ദാരവും ചെമ്പകപ്പൂവും
കൈകോർത്തിന്നുനിന്നു
തിരുമുറ്റത്തെ പൂക്കളത്തിൽ

താളത്തിൽ പാട്ടുപാടിയാടീടാം
തിരുവാതിരയാടീടാമങ്കനമാരേ
മാവേലിയെയെതിരേല്ക്കാൻ
ഒരുങ്ങിവന്നാട്ടേ കളിയാടുവാൻ

കതിരോൻ കാലത്തുദിച്ചീടുന്നു
പൊൻപ്രഭ തൂകിയൊരുങ്ങീടുന്നു
പൂന്തേനുമായി നിങ്ങളും പോരൂ
പൂമ്പാറ്റക്കുഞ്ഞുങ്ങളേ ചേലിൽ

ഓണപ്പായസമുണ്ണാനോടിവായോ
ഓണക്കോടിയുടുത്തു നീ വായോ
തൂശനിലയിൽ വിളമ്പീടാം സദ്യ
അവിയലുമോലനുമെരിശ്ശേരിയും

ഊഞ്ഞാലാടാം മാവിൻകൊമ്പിൽ
പൂന്തെന്നലോടൊപ്പമാടിപ്പാടാം
മാവേലിയെത്തീടുമോണനാളിൽ
ആമോദമോടെ വരവേറ്റിടാം
"" "" "" "" "" "" "" "" "" "" "" "" "" "" ""
ഗീതാഞ്ജലി
3-9-2020

ഓസോൺ ദിനം-സെപ്റ്റംബർ 16

 

ഓസോൺ ദിനം-സെപ്റ്റംബർ 16
""""""""""""""""""""""""""""""""""""""""""""
വിണ്ണിലേക്കുയരും പുകച്ചുരുളുകൾ
മണ്ണിൽ മരണക്കെണി തീർക്കവേ
ഭൂമിയെ മലിനമാക്കാൻ മടിയ്ക്കാത്ത
മാനുഷാ നിൻകുഴി നീ കുഴിക്കുന്നു

തേങ്ങുന്നു പൃഥിതൻ മനം ചൂടേറ്റ്
കരിയുന്നുലയുന്നു വിഷം ശ്വസിച്ച്
ഉയരുന്നു ഭൂമിതൻ നെടുവീർപ്പുകൾ
മാനുഷാ നീയിതു കേട്ടിടുമോ?

പച്ചപ്പു വറ്റി വരണ്ടുപോയൊരു ഭൂവിന്
ദാഹജലം നീയേകുമോ മർത്ത്യാ?
നീ തീർത്ത പുകക്കുഴലുകൾ തുപ്പുമീ
മലിനമാം ധൂമം നിറഞ്ഞൊഴുകുന്നു.

ഭൂമിതന്നാത്മാവിൻ നിലവിളിയുയരുന്നു
കേട്ടിടാനെന്തേ നീ വൈകിടുന്നിന്നും
ഭൂമികുലുക്കവും വരൾച്ചയും പ്രളയവും
ഭാവങ്ങളല്ലോ പല നിലവിളികൾതൻ

കൊല്ലരുതേ, നിന്നെ സംരക്ഷിച്ചീടുന്ന
ഭൂവിനെയിനിയും നീ നോവിക്കരുതേ
ഭൂമിതൻ കണ്ണീരു കാണാതെ പോകയോ
മർത്ത്യാ നീ പെരുവഴിയിലാകരുതേ
"" "" "" "" "" "" "" "" "" "" "" "" "" "" "" "" "" "" "" ""
ഗീതാഞ്ജലി
16-9-2020

 

ലളിതഗാനം(മലയാളനാടേ)

 

ലളിതഗാനം(മലയാളനാടേ) 
"" "" "" "" "" "" ""
മലയാളനാടേ മലയാളനാടേ
നീയെൻ സ്വർഗ്ഗമല്ലേ
മരതകക്കാന്തിയണിഞ്ഞുനില്ക്കും
നിന്നഴകിനെ വാഴ്ത്തുമീയുലകം
                      (മലയാളനാടേ....)
മാവേലിപ്പാട്ടിൻറെ തനിമകളിൽ നിറയും
മധുവൂറുമീണത്തിൽ നീ നിറയും
മധുരപ്പതിനേഴിലാണല്ലോ നീ നിത്യം
മയൂരമായിനിയെന്നും നർത്തനമാടൂ
                       (മലയാളനാടേ.....)
കലയുടെ പൈതൃകകാൽച്ചിലമ്പൊലികൾ
കണ്ടു നിൻ നടനത്തിൻ താളലയങ്ങളിൽ
കമനീയമാകുമീ മലയാളമൊഴിയെ
കനകക്കിരീടമണിയിച്ചിടാനണയൂ
                       (മലയാളനാടേ.....)
 

ലളിതഗാനം (കർക്കടകപ്പെരുമഴ)

 

ലളിതഗാനം (കർക്കടകപ്പെരുമഴ)
"" "" "" "" "" ""
കർക്കടകപ്പെരുമഴ പോയ്മറഞ്ഞു
ആദിത്യൻ കസവുനൂൽ നെയ്തിടുന്നു
പൂത്തുമ്പികൾ പാറിപ്പറന്നിടുന്നു,പൂക്കൾ
ചിങ്ങത്തെ വരവേറ്റിടാനൊരുങ്ങിടുന്നു

ചിങ്ങനിലാവിൽ ചിറ്റാട നെയ്യും
പൊന്നമ്പിളി വരവായല്ലോ
കുണുങ്ങിയോടും പവനനുമെത്തി
നറുമണമെങ്ങും വിതറിടുന്നു
                                             (കർക്കടക.....)
ഓരോ ഓണവും ഓർമ്മകൾ നൽകും
മധുരാനുഭൂതികളാണല്ലോ
ഓർമ്മകൾ തുഴഞ്ഞെത്തിയോടിവള്ളം
സ്മരണകൾതൻ കടവിൽ
                                              (കർക്കടക.....)

മോഹപ്പക്ഷി

മോഹപ്പക്ഷി
"" "" "" "" "" "" ""
ചിറകു വിടർത്തി പറന്നുനടന്നു
എന്നിലെ മോഹപ്പക്ഷിയിന്നും
കൂട്ടിലടച്ചൊരു കിളിയായി ഞാനും
മഹാമാരി പരക്കുമ്പോൾ

ഉലകത്തിൽ ചുറ്റിപ്പറക്കാൻ
ഉള്ളിലൊരു മോഹമുദിപ്പൂ
സ്വതന്ത്രയായി വിഹരിച്ചിടാൻ
എത്രനാളായി കാത്തിരിപ്പൂ

സ്വയം വരിച്ചൊരു തടവറയിൽ
മോഹങ്ങളടക്കി വിതുമ്പി
അകലം പാലിച്ചിടാൻ ചുറ്റും
വേലി തീർത്തൊരു വ്യാധി

എന്നു ഞാനീ വേലി പൊളിച്ചു
കൂട്ടരൊത്തു ചേർന്നിടും?
സ്നേഹത്തിൻ പുതുകാവ്യങ്ങൾ
ഒരുക്കാനെന്നു കഴിഞ്ഞിടും?
"" "" "" "" "" "" "" "" "" "" "" "" "" "" "" ""
ഗീതാഞ്ജലി
21-9-2020

ലളിതഗാനം (സാന്ദ്രമൗനം)

 

ലളിതഗാനം (സാന്ദ്രമൗനം)
"" "" "" "" "" ""
സാന്ദ്രമൗനം ചൂടിനില്ക്കും
എന്നധരപുടങ്ങൾ തേടും
ഗാനത്തിൻ പല്ലവിയായുണരൂ
വൃന്ദാവനകുസുമമേ നീ

അവാച്യമായൊരു മാന്ത്രികശബ്ദം
ഹൃദയതാളമായ് പ്രതിധ്വനിക്കേ
നീയെന്നിൽ ചൊരിയുന്നു നീളേ
മൗനരാഗത്തിൻ കിരണങ്ങൾ
                        (സാന്ദ്രമൗനം)
ആയിരം കവിതകൾ കണ്ണുകൾ ചൊല്ലും
നേരമിങ്ങിനിയിനിയും വരുമോ?
ആയിരം വസന്തങ്ങൾ തീർത്തൊരാ
നറുസുഗന്ധം പകരുമോ?
                  (സാന്ദ്രമൗനം)

തിരകൾ തേടുന്ന തീരം

തിരകൾ തേടുന്ന തീരം

"" "" "" "" "" "" "" "" "" "" ""
തിരകളോടിയെത്തുന്നിതാ
തീരത്തിനെ പുണരാൻ
തിരിയെ പോകുംമുമ്പൊന്നു
തീരത്തിനെ ചുംബിക്കാൻ

തേടിയെത്തുന്നു തീരത്തിനെ
ഹൃദയരഹസ്യം ചൊല്ലിടാൻ
തീരത്തിനറിയുമോ വേർപാടിൻ
ദു:ഖമലതല്ലി കേഴും തിരയെ

നൊമ്പരക്കുമിളകൾ നുരയുന്നു
നെഞ്ചിലേറ്റുന്നു മൗനരാഗം
ആയിരം കൊലുസുകളണിഞ്ഞു
ആരെത്തേടിയണയുന്നു

ഗീതികൾ പാടിയുയരും തിരകൾ
കൊതിയോടെയുയരും തീരം തേടി
പിന്നെയും പിന്നെയും പുണരാൻ
വെമ്പുന്നൊരുനോക്കു കാണാൻ
"" "" "" "" "" "" "" "" "" "" "" "" "" "" "" "" "
ഗീതാഞ്ജലി
28-9-2020