മൗനം

 

മൗനം
********
മൗനം നിൻ മനസ്സിൽ കൂടുകൂട്ടവേ
അസ്വസ്ഥതതൻ നെരിപ്പോടെന്നിലും
ചിറകറ്റ പക്ഷിയായി വിതുമ്പവേ
എന്നുടെ ഗദ്ഗദം കേൾക്കുമോ നീ?

നിലാവ് തുന്നുന്നൊരു പട്ടുതൂവാല
എൻ കണ്ണുനീരൊപ്പുവാനീ രാവിൽ
ആധിനിറച്ചു നിൻ മൗനം തുടരവേ
എൻ ഹൃദയമിടിപ്പിനും താളഭംഗം

നിദ്ര വഴിമാറിപ്പോകവേയെന്നിൽ
നിറയുന്നു നിന്നോർമ്മച്ചിന്തുകൾ
നീർമണിമുത്തുകളലതല്ലിയാർത്തു
നൊമ്പരതീരമാമെൻ കപോലത്തിൽ

നിൻ മൗനത്തിന്നർത്ഥം തിരഞ്ഞു
നിമിഷങ്ങളെണ്ണി തപസ്സിരുന്നു ഞാൻ
നിൻമൊഴിമൊട്ടുകൾ വിരിഞ്ഞിടാ-
നശ്രുകണങ്ങളാൽ നനവേകി ഞാൻ

രാവിനും മൗനത്തിന്നൂഞ്ഞലാടാൻ
രാഗമോ നിന്നെപ്പോലെൻ പ്രിയതേ
മൗനവല്മീകത്തിൽനിന്നെന്നു നീ
മനോവീണതൻ തന്ത്രികൾ മീട്ടിടും?

നിൻ വാക്കിനോരത്തു കാത്തിരിപ്പൂ
നീറുമെൻ നെഞ്ചകം ചുട്ടുപൊള്ളീടവേ
ഇരുൾ വന്നു മൂടുമെന്നാത്മാവിൽ നീ-
യിനിയൊന്നു വാക്കിൻ തിരി തെളിക്കൂ

മഴവില്ലു മാനത്തു തെളിഞ്ഞിടുമ്പോൾ
മയിലുകളാടിത്തിമിർക്കുംപോലെ
നിൻ സ്നേഹവചസ്സുകൾ പെയ്തിടവേ
നർത്തനമാടുവാൻ മനം തുടിപ്പൂ.

പകരമാകില്ലേതമൃതുമിന്നു നിന്നുടെ
പനിനീർത്തുള്ളികളാകും മൊഴികൾക്ക്
ഉരുകി ഞാൻ വീണിടുമിന്നു മണ്ണിൽ
നിൻ മൊഴി കേൾക്കാതിരിക്കിൽ
ഗീതാഞ്ജലി
8-9-2025
***********************************************