വേരറ്റുപോകുന്ന ഹൃദയങ്ങൾ

 

വേരറ്റുപോകുന്ന ഹൃദയങ്ങൾ
*********************************
പ്രതീക്ഷതൻ മിന്നാമിനുങ്ങിനെ
കാണുവാനാകാതെ ഞാൻ തളരവേ
ജീവിതവ്യഥകൾതൻ ചങ്ങലകൾ
മുറുകുന്നു ചുറ്റിലും ഞെരുക്കാൻ

തകർന്ന സ്വപ്നങ്ങൾതൻ ചിന്തുകൾ
വീണുകിടക്കുന്നുണ്ടെനിക്കു ചുറ്റും
വേരറ്റുപോയൊരെൻ ഹൃദയമിന്നും
തുടിക്കുന്നൊരിറ്റു പ്രാണനു വേണ്ടി

നിശാശലഭമായി പറക്കുന്നുണ്ടെൻ
മാനസം ദുഃഖങ്ങൾതൻ ഭാണ്ഡം പേറി
സപ്തസ്വരങ്ങൾ വീണുടഞ്ഞ വീണ
മൗനസംഗീതം പൊഴിക്കുന്നുവോ

ഒരു തൈമണിത്തെന്നലായരികിൽ
വരുമോ നീയെൻ കണ്ണീരൊപ്പുവാൻ
നെറുകയിലൊരാശ്വാസചുംബനം
തരുമോയെൻ പ്രാണനിലമൃതായി

ഗീതാഞ്ജലി
8-9-2025
***************************************