നിശാഗന്ധി

*നിശാഗന്ധി*

"" "" "" "" "" ""
നിശയിലുണർന്നോ സ്മേരമണിഞ്ഞോ
നറുമണമേറ്റോ ചുറ്റിലുമെങ്ങും
അഴകു വിരിച്ചീ പൂവനമദ്ധ്യേ
അനഘമൊരോമൽപ്പൂവിതു നീയോ?

ഭുവനമതാകേ നിദ്ര വരിക്കേ
ഉണരുവതെന്തേ നീ പ്രഭ തൂകി
നിശയിലണഞ്ഞോ തെന്നലുമൊപ്പം
കവരുവതിന്നായ് മാദകഗന്ധം

വിജനമതാം പന്ഥാവിലൊരിറ്റു
ഭയമതുപോലും തോന്നുവതില്ലേ?
സഫലമതല്ലോ നിന്നുടെ ജന്മം
നിശയുടെ മാറിൽ ചേർന്നൊരു പുണ്യം

ചെറിയൊരു താരം കൈകളെ നീട്ടീ
അനുപമഗന്ധം കോരിയെടുക്കാൻ
പരിസരമാകേ പൂമണമേകീ
അഴകുവിരിപ്പൂ നിൻ ദളമാകേ
(വൃത്തം - മൗക്തികപംക്തി)
തതതതതംതം തംതതതംതം
"" "" "" "" "" "" "" "" "" "" "" "" "" "" "" "" "" ""
ഗീതാഞ്ജലി
4-8-2020