മഴവില്ല്

 *മഴവില്ല്*

*********
ഒരു മഴവില്ലിൻ ഞാണൊലി കേട്ടൂ
ദ്യുതി വിതറീടും വാനമതിങ്കൽ
നിറയുകയായീ വർണ്ണമിതെന്നിൽ
മറയരുതേ നീ വാർമഴവില്ലേ

ഒരു നവരാഗം ചാർത്തിയണഞ്ഞോ
നിരുപമകാന്തിപ്പൊൻകതിരായി
തിരുമധുഹാസം ചുണ്ടിലണിഞ്ഞു
വിരിയുകയായീ പൂക്കളിതെങ്ങും

കതിരവനെന്തേ പമ്മിയണഞ്ഞൂ
അതിരുകവിഞ്ഞോ നിന്നുടെ കാന്തി?
മലരുകളെങ്ങും കൗതുകമോടെ
കലയുടെ മാമാങ്കം കണികാൺകേ

നിറയുകയെന്നിൽ ഭാവനയായി
പറയുക മൂകം പ്രേമവചസ്സാൽ
ഒരു നവരാഗം മൂളുകയായി
ഹരമൊടു വാഴ്ത്താൻ നിന്നുടെ ഭംഗി

മിഴി നനയുന്നോ നീ മറയുമ്പോൾ
മഴയുടെ തേങ്ങൽ കേൾക്കുകയില്ലേ?
മൊഴിയിടറുന്നോ കോകിലമേ ഹാ!
അഴകൊരു നേരം മിന്നിമറഞ്ഞാൽ

വിരഹമതെന്നിൽ പെയ്യരുതേ നീ
ഇരുളിമ മായ്ക്കാൻ നീ വരുകില്ലേ
അരുണിമ ചാർത്താനേഴു നിറങ്ങൾ
തരികൊരു കാവ്യം ചേലിലൊരുക്കാൻ
(വൃത്തം -മൗക്തികപംക്തി
താളം -തതതതതംതം തംതത തംതം)
ഗീതാഞ്ജലി
5-8-2025
*******************************************