പാതി തുറന്ന ജാലകം

 പാതി തുറന്ന ജാലകം

***********************
ഇന്നെന്റെ മുറ്റത്തെ കാഴ്ച കാണാൻ
ജാലകം പാതി തുറന്നനേരം
സായാഹ്നസൂര്യനൊന്നെത്തിനോക്കി
ചിരിതൂകി മെല്ലെയകന്നുപോയി

നാലുമണിപ്പൂക്കൾ കണ്ണുചിമ്മി
താളത്തിൽ തലയാട്ടി ചാഞ്ചാടുന്നു
കണ്ണിമയ്ക്കാതെ ഞാൻ നോക്കിനില്ക്കേ
കണ്ണറിഞ്ഞെന്നെ മയക്കിടുന്നു.

മൂവാണ്ടൻ മാവിലെ മാങ്ങയൊന്നെൻ
മാമ്പഴക്കൊതി തീർക്കാൻ കാത്തിരുന്നു
കൊതിപ്പിക്കും സ്വാദുമായ് തേൻവരിക്ക
ഇന്നെന്നെ കൈകാട്ടി വിളിച്ചിടുന്നു.

ഇന്നലെ പെയ്തൊരു വേനൽമഴ
നൽകിയ കുളിരലയെന്നെ മൂടി
മണ്ണിന്റെ പുതുമണം തങ്ങിനിന്നു
ജാലകത്തിലൂടൊഴുകിവന്നു.

സന്ധ്യതൻ സിന്ദൂരം കവർന്നെടുത്തു
പടിഞ്ഞാറേ മാനത്ത് കുടഞ്ഞിടുവാൻ
മത്സരിച്ചൊരുങ്ങുന്നു മേഘജാലം
മദിപ്പിക്കുമെന്നെയീ വർണ്ണമേഘം.
********************************************
ഗീതാഞ്ജലി
4-6-2025
**********************************************