പുഞ്ചിരി

 പുഞ്ചിരി

**********
പുഞ്ചിരി നിന്നുടെ ചുണ്ടിണ തന്നിൽ
വിരിയുക വേണമിതെന്നുമെ നിത്യം
പാലൊളി തൂകിടുമാ കവിളിൽ നിൻ
പ്രഭ ചൊരിയട്ടെ മനോഹരഹാസം

കണ്ണിലുദിച്ചൊരു തേജസു കണ്ടാൽ
ഉഡുനിര ഭൂവിലുണർന്നതുപോലെ
സുന്ദരമായൊരു പുഞ്ചിരി നിന്നിൽ
വിടരുകയായൊരു പൂത്തിരിയായി

മായരുതേ തവ ഹാസമതെന്നിൽ
വിരിയുകയായൊരു മഞ്ജുളകാവ്യം
താവകഹൃത്തിലെ പൊൻകതിരെന്നിൽ
ചൊരിയുകയായൊരു പഞ്ചമരാഗം

തൂവുക നിന്നുടെ തൂമധുഹാസം
നിരുപമമാമൊരു വാർമഴവില്ലായ്
സുന്ദരമായൊരു വാടിക തന്നിൽ
കുസുമദലങ്ങളതെന്നതുപോലെ

വൃത്തം:ദ്രുതമദ്ധ്യ
താളം:തംതത തംതത തംതത തംതം
തതതത തംതത തംതത തംതം
ഗീതാഞ്ജലി
3-10-2025
**********************************************