സ്വപ്നം

 സ്വപ്നം

*********
ഒരു കൊച്ചു സ്വപ്നത്തിൻ ചിറകിലേറി-
പ്പറക്കുവാനതിയായ മോഹമോടെ
ഇനിയൊന്നുറങ്ങട്ടെയിത്തിരി നേരമീ
മരത്തണലിലിരുന്നു ഞാൻ

കൊഴിയുന്നയിലകളെൻ മൂർദ്ധാവിൽ
അരുമയായി സ്പർശിച്ചീടുമ്പോൾ
ഒരു സുന്ദരസ്വപ്നമെന്നെ തഴുകിയോ
കുളിർകാറ്റിനലകൾ പോലെ

അടയുന്ന മിഴികളെ മുട്ടിയുരുമ്മിയോ
കുസൃതിച്ചിരിയോടെ നിദ്രാദേവി
കനവുകണ്ടുണരാൻ കൊതിച്ചു ഞാൻ
കലമാനിനെപ്പോലെ കണ്ണുചിമ്മി

തിരയായി തഴുകൂ മിഴികൾതൻ തീരത്ത്
ഒരു വീണയിലുണരും ശ്രുതിയായി വരൂ
നിറദീപമായ് തെളിയൂ വിൺതാരകപോൽ
ഒരു ചിപ്പിതൻ മുത്തായി വരൂ നീ കിനാവേ

വരു നീ വിരുന്നുകാരിയായി പ്രിയസ്വപ്നമേ
അകലേക്കു പിണങ്ങിപ്പോകരുതേ
തിരയുന്നു നിന്നെയെൻ മനസ്സിൻ പച്ചപ്പിൽ
കതിരിടും മോഹത്തിൻ തേരിലേറി.
**********************************************
ഗീതാഞ്ജലി
3-1-2025
************************************************