ഞാൻ ഗന്ധർവൻ

 ഞാൻ ഗന്ധർവൻ 

********************

നിന്നെയുംതേടി ഞാനലയുന്നു

ഇന്നുമീ പ്രപഞ്ചത്തിലക്ഷമനായി

പാല പൂത്ത രാവിൻ രണ്ടാം യാമത്തി-

ലെത്തിടാം ഞാനെന്ന ഗന്ധർവൻ 

നിന്നെ കടാക്ഷിച്ചിടുവാനായിനി

എത്ര ജന്മങ്ങൾ കാത്തിരിക്കേണം 

ദേവീ നിൻ ചാരെയണയുവാനെൻ

ഹൃദയം തുടിക്കുന്നീ നാഴികയിൽ

ഏഴു സ്വർഗ്ഗങ്ങൾ താണ്ടി ഞാനണയാം

ഏഴു കുതിരകൾ കെട്ടിയ രഥമേറി

എൻ പ്രണയമറിയിക്കാനെത്തിടാം

ഒരു മഴത്തുള്ളിയായ് ഞാൻ പുണരാം 

ആലിംഗനങ്ങളാൽ മൂടിടാം നിൻ മേനി 

വിട ചൊല്ലും മുമ്പെയെന്നോമലാളേ

വിരഹത്തിൻ ചൂടിൽ നീയെരിയുമ്പോൾ

ഹിമകണങ്ങളായി പെയ്തിടാം ഞാൻ 

എൻ കിന്നരവീണയിൽ ഒരു പ്രേമഗാനം 

സുഭഗേ നിനക്കായ് ഒരുക്കീ ഞാൻ വിറയാർന്ന ചുണ്ടിലെ തേൻ നുകരാൻ 

ഒരു ശലഭമായി ഞാൻ പാറിവരാം

ഒരു മൂകരാഗമായകലേക്കു പോകേണ്ടി

വന്നാലുമെന്നെ നീ മറക്കരുതേ 

പോകാതെ വയ്യയീ ഭൂമിയിൽനിന്ന് 

തിരികെ വരുവാനുമാകില്ല പൊന്നേ

എങ്കിലും ഞാനൊരുഡുവായി വിണ്ണിൻ 

കോണിലിരുന്നെന്നും കൺകുളിർക്കെ 

നോക്കിയിരുന്നിടാം ജന്മാന്തരങ്ങളായ് 

രാത്രിതൻ നിശ്ശബ്ദയാമങ്ങളിൽ പ്രിയേ

ഗീതാഞ്ജലി 

9-7-2025

************************************