വിരഹം

 വിരഹം

*********

നിറയും മിഴിസാഗരത്തിലായ്

തിരമാലകളാർത്തിരമ്പിയോ

നനയും മുഖമാകെ തേങ്ങലാൽ

വിറകൊള്ളുകയായി നിത്യവും.

വിരഹം മഴയായി പെയ്തിടും 

നിമിഷങ്ങളിലൊന്നറിഞ്ഞു ഞാൻ 

ഉലകം ദയവറ്റിയെന്നതും

ഹൃദയം ചുടുകാട്ടിലായതും

കഠിനം ചില വാക്കുകൾ സമം 

ശരമായിടുമെന്നു നിശ്ചയം 

വ്രണമിന്നതൊഴുക്കി ശോണിതം

പടരും മനമാകെ, വിങ്ങലായ്

പിടയും മനമൊന്നുലഞ്ഞിടും

പ്രണയം തകരുന്ന വേളയിൽ 

പറയൂ പ്രിയനേ നിനക്കു ഞാൻ 

ഹൃദയം മുറിയുന്നൊരോർമ്മയോ?

മധുരം കിനിയുന്നൊരോർമ്മ നീ

മമഹൃത്തിലെ വാടിയിൽ ചിരം 

വരുമോ പ്രിയതോഴനായി നീ

തരുമോ തിരുവാക്കിനാൽ മധു

നിറയൂ മമ ഹൃത്തിലെന്നുമേ

ചൊരിയൂ കിരണം സ്മിതത്തിനാൽ

മമമാനസമാകെ നിൻ മുഖം 

മറയാതെ തെളിഞ്ഞുനിൽക്കവേ

വിരഹം കഠിനം, ഭയാനകം 

നിറയും മനമാകെ കൂരിരുൾ 

അരികത്തണയൂ വെളിച്ചമായ്

കുളിരായിനി നീ പുണർന്നിടൂ.

വൃത്തം:സുമുഖി

താളം:തതതം തത തംതതംതതം

ഗീതാഞ്ജലി 

24-8-2025

*****************************************