ഗാസയിലെ രോദനം

 ഗാസയിലെ രോദനം

*********************
ഗാസ കരയുന്നുള്ളുലഞ്ഞാർക്കുന്നു
പട്ടിണിക്കോലങ്ങൾ വീണടിയുന്നു
വിശപ്പിൻ്റെ മുന്നിൽ പതറിപ്പോയവരാം
കുഞ്ഞുങ്ങൾതൻ നിലവിളി കേട്ടുവോ

മനസ്സു മരവിച്ചോർ പൊട്ടിച്ചിരിക്കുന്നു
യുദ്ധകാഹളം മുഴക്കുന്നു ഗാസയിൽ
മനസ്സാക്ഷി വെടിഞ്ഞോർക്ക് കളിയല്ലോ
യുദ്ധം വെറും തലപ്പന്തുകളിയീ കൂട്ടർക്ക്

വിരളമായെത്തും ഭക്ഷണവണ്ടിക്കു ചുറ്റും
ഒഴിഞ്ഞപാത്രവുമായി നില്ക്കും കിടാങ്ങൾ
ഒരുനേരത്തെ വറ്റിനായിരക്കും കാഴ്ച കാണൂ
മനസ്സിനെ മഥിക്കില്ലേയീ ചിത്രം വേട്ടക്കാരേ?

ബോംബിനാൽ തകർന്നു മുറിവേറ്റവർ
ഹൃദയം നുറുങ്ങുമീ ദൃശ്യമസഹ്യമല്ലോ
ഇവരുടെ നിലവിളിയുയർന്നു തെരുവിൽ
ആശുപത്രികളും തകർന്നടിയവേ മണ്ണിൽ

നിസ്സഹായരാം മനുഷ്യർതൻ തേങ്ങൽ
അലയടിച്ചുയരുന്നുലകമെങ്ങും
എങ്കിലും കേൾക്കാത്തമട്ടിലിരിപ്പൂ
ലോകരാഷ്ട്രങ്ങൾതൻ തലവന്മാർ

യുദ്ധത്തിലനാഥരാക്കപ്പെട്ടവർതൻ
മനസ്സിൻ പിടച്ചിൽ കേൾക്കുമോ
കൂട്ടക്കൊലയ്ക്കറുതി വരുത്താൻ
അവതരിക്കുമോ ദൈവങ്ങൾ?

തേങ്ങലുകൾ അലയടിക്കുന്നുയരെ
അസ്വസ്ഥതതൻ കാർമേഘം ചുറ്റിലും
രക്തദാഹികൾ കഴുകന്മാർ കണക്കേ
പാറിപ്പറക്കുന്നു തക്കം പാർത്തെങ്ങും
ഗീതാഞ്ജലി
26-8-2025
*********************************************