വയൽപ്പൂക്കൾ
"" "" "" "" "" "" "" ""
സന്ധ്യതൻ മുഖമിതാ ചെമന്നുവോ
കുങ്കുമം വിതറിയാകെ പാരിതിൽ
തെന്നലെൻ കവിളിലുമ്മ നൽകുവാ-
നോടിവന്നരുമയോടെ മൂളിയോ?
കാണ്മതുണ്ടു വയലിൽ നിരന്നിടും
പൂക്കളിൻ നിരകളാർദ്രമായിതാ
ഉറ്റുനോക്കുമൊരു മേഘജാലമൊ-
ന്നാശയറ്റ മമ ജീവവേണുവിൽ
ഓർമ്മയായിതൊരു ബാല്യകാലവും
യൗവനത്തിലുലയാത്ത വർണ്ണവും
ആ വയൽക്കുസുമമായി ശോഭയിൽ
നർത്തനം തുടരുമോ അനന്തമായ്
നന്മതൻ കതിരു ചാർത്തിയാടുവാൻ
ഭംഗിയോടെ ചിരി തൂകിനില്ക്കവേ
പൂക്കളായി നല മോഹമായിരം
പ്രേമപൂർവ്വമൊരു ചാരുചിത്രമായ്
(വൃത്തം - രഥോദ്ധത)
*********************************************
No comments:
Post a Comment