പൊൻപുലരി

 പൊൻപുലരി

***************
പുത്തനാം ഗാനം പുലരിയിൽ തീർപ്പൂ
കോകിലം മാവിൻ ശിഖരമദ്ധ്യത്തിൽ
പാടുമീ കായൽധ്വനികളിന്നെന്നിൽ
രാഗതാളത്തിൽ ചൊരിയവേ ചേലിൽ

ആർദ്രമീ കാറ്റിന്നലകളാൽ നൃത്തം -
വച്ചിടും മാവിൻ ശിഖരവൃന്ദങ്ങൾ
കണ്ണിലും കാന്തിക്കതിരു തൂകുന്നോ
സുപ്രഭാതത്തിൽ കതിരവൻ ഭംഗ്യാ

ചാർത്തിയീ ഭാതം നിറയെ സിന്ദൂരം
ഭൂമിദേവിക്കിന്നുമൊരു ലാവണ്യം
കണ്ണുകൾ ചിമ്മിത്തുടരുമീ നൃത്തം
ഭൃംഗവും പൂതേടി വരുമീ നാളിൽ

നീർത്തുവാൻ മണ്ണിൽ വിളവിനാൽ നീളേ
ചാർത്തിടാനർക്കൻ കിരണജാലങ്ങൾ
താഴ്ത്തിയെത്തുമ്പോൾ മധുര മുത്തങ്ങൾ
തന്നിടാൻ ചേലിൽ വിരുതു കാട്ടുന്നൂ

ചക്രവാളത്തിൽ പ്രഭ ചൊരിഞ്ഞർക്കൻ
മേഘമാകും തേരിലണയും നേരം
സ്വീകരിച്ചീടാനുണരുവിൻ നിങ്ങൾ
പൂക്കളേ ഭംഗ്യാലരിയഹാസത്താൽ

നന്മ തൂകും ചിന്തകളൊരുക്കീടാം
വെണ്മയേറ്റാം മാനസവിതാനത്തിൽ
സ്നേഹമൂറും ഹൃത്തിലൊരു കാവ്യത്തിൻ
തേജസൊന്നേവം നിറയുവാനിന്നും.

വൃത്തം:ഗീതിക (സ്വയം ചിട്ടപ്പെടുത്തിയ വൃത്തം)
താളം:തംത തംതംതം തതത തംതംതം
ലക്ഷണം:
ഗീതികാവൃത്തം രതസഗംഗത്താൽ
ഗീതാഞ്ജലി
24-7-2025