പുലരൊളി
*************
പുലരൊളി തുന്നിയ കസവിതു നീളേ
ഞൊറിയുകയാണിഹ ധരണിയിലെങ്ങും
കുസുമദലങ്ങളുമൊളിചിതറുന്നു
നവനവചേതനയുണരുകയല്ലോ
നറുമണമേന്തിയ പവനനുമെത്തി
വിതറിടുമാവഴി തരളിതഗന്ധം
ദിനകരനെത്തിയ രഥമിതു കാണ്മാൻ
വിരിവതു മൊട്ടുകളനവധി ചേലിൽ
കതിരവനോ മൃദുഹസിതസമേതം
കതിരിടുമാശയൊടൊളിവിതറുന്നു
കുയിലിണ പാടിയ മധുരിതഗാനം
നിറയവെയൂഴിയിലനുപമരാഗം
മധു നുകരാൻ ചെറുശലഭമതെത്തി
നിറമതു പാകിയ ചിറകുകളേന്തി
ശുഭകരമായ് നറുപുലരി വിരിഞ്ഞു
ശുഭദദിപോൽ നവദിനമണയുന്നു.
വൃത്തം:ലളിതശരീരം
ന ജ ന സഗം കില ലളിതശരീരം
താളം:തതതത തംതത തതതത തംതം
ഗീതാഞ്ജലി
No comments:
Post a Comment