തിരുവോണം

 തിരുവോണം

****************
തിരുവോണദിനം തരും നിറം
മനമാകെ നിറച്ചു ഞാനിതാ
പുതുപൂക്കളമൊന്നൊരുക്കിയീ
വിടരും നറുസൂനശോഭയാൽ

കനകം ചൊരിയുന്നൊരർക്കനും
കുശലം പറയുന്ന തെന്നലും
മമമാനസമാകെ വിസ്മയം
പകരുന്നു തുടുത്ത വാനവും

ഒരു സദ്യയൊരുക്കി ഞാനിതാ
അവിയൽ,പുളിയിഞ്ചി തോരനും
ചുടുപായസമോടെ പപ്പടം
പഴവും ബഹുകേമസദ്യയായ്

കളിയും ചിരിയും നിറഞ്ഞിതാ
കളിയൂഞ്ഞലിലാടുമെൻ മനം
തിരുവാതിരതാളമൊന്നിതാ
മനതാരിലുണർന്നു മേളവും

നിറപുഞ്ചിരി നാട്ടിലെങ്ങുമേ
വിതറാൻ തിരുവോണമിന്നിതാ
മതവേലികളൊക്കെ മാറ്റിയീ
സുകൃതം പകരുന്ന നേരമായ്

തിരുമേനി മഹാബലിക്കിതാ-
യെതിരേല്പു കൊടുക്കുവാൻ മനം
നിറയും നവകാഴ്ചകൾ തരും
തിരുവോണമഹോത്സവം ചിരം
ഗീതാഞ്ജലി
1-9-2025
വൃത്തം:സുമുഖി
താളം:തതതംതത തംത തംതതം
*************************************