യാത്ര

 യാത്ര

*********
യാത്രകൾ ചെയ്തിടാനെൻ മാനസം തുടിക്കുന്നു
നീണ്ടതാം യാത്രയൊന്നു ചെയ്യുവാൻ മോഹമുള്ളിൽ

ഏറ്റവും പ്രിയമുള്ള നിന്നുടെ കൂടെക്കൂടി
പോകുവാനാശയെന്നിൽ പക്ഷിപോൽ പറന്നീടാൻ

യാത്രയ്ക്കായൊരുങ്ങീടാനേറ്റവും മോടിയോടെ
ചന്തത്തിൽ ചമഞ്ഞു ഞാൻ സുസ്മേരമോടെയിതാ

പോകുന്നവഴിവക്കിൽ കാണുന്നോരോടെല്ലാമേ
കളിവാക്കോതിടുവാൻ പോരുമോയെൻ്റെകൂടെ

അലസം നീങ്ങിടുന്ന മന്ദസമീരൻപോലെ
യാത്രകൾ ചെയ്തിടാനെൻ ഹൃത്തടം കൊതിക്കുന്നു

ഓരോരോ ദേശങ്ങളിൻ സംസ്കാരം തൊട്ടറിയാൻ
സൗന്ദര്യമാസ്വദിക്കാനാരാമഭംഗികളിൻ

വിടരും മൊട്ടുകളിൽ മുത്തമിട്ടണഞ്ഞൊരാ
പൂത്തുമ്പിയായി ഞാനുമലയാൻ വെമ്പിനില്പൂ

ജീവിതയാത്ര തീരുംമുമ്പേയെന്നാശകളിൻ
കതിരും ചൂടിനില്പൂ സങ്കല്പവേദിയിതിൽ

വരുമോ നീയെൻകൂടെ കാണാത്തൊരൂരു ചുറ്റാൻ
തരുക്കൾ വസന്തത്തെ വരവേൽക്കവേ നീളേ

കാണാത്ത കാഴ്ചകളിൻ മധുരം നുണഞ്ഞിടാൻ
കേൾക്കാത്ത ഗാനത്തിൻ്റെ ശ്രുതിയായലഞ്ഞിടാൻ

കൊതുമ്പുവള്ളം തുഴഞ്ഞക്കരെ പോയിടാനായ്
നിലാവിൻ ചേലത്തുമ്പിൽ ചേർന്നു ഞാൻ നിന്നീടുന്നു

കാഴ്ചകൾ ചിത്രങ്ങളായ് പതിഞ്ഞു മാനസത്തിൽ
യാത്രയിൽ വെളിച്ചമായ് പൊൻകതിർ തൂകും നേരം

ഇമ്പമാർന്നുള്ള ഗാനപല്ലവി മൂളി നീയെൻ
തുമ്പമകറ്റി യാത്ര ചെയ്തിടുവാനെൻ കൂടെ

യാത്രയിൽ തളർന്നിടുമ്പോഴെല്ലാം ചാരിനില്ക്കാൻ
നീയൊരാൽവൃക്ഷമായി പടർന്നുനില്പൂ ചാരേ

എൻ്റെ ചിന്തകൾ യാത്ര ചെയ്തവസാനിക്കുന്നു
നിന്നിലേക്കല്ലോ സഖേ ഞാൻപോലുമറിയാതെ
വൃത്തം -കേക
ഗീതാഞ്ജലി
17-9-2025
******************************************