ശ്രീകൃഷ്ണലീലകൾ

 ശ്രീകൃഷ്ണലീലകൾ

*********************
കണ്ണൻ്റെ മാറിലാ പൂമലർ മാലയായ്
മാറുവാൻ മോഹമൊന്നെന്നിലുദിക്കുന്നു

എന്നുമേ നിൻവേണുനാദമായൻപെഴും
വൃന്ദാവനത്തിൽ നിറഞ്ഞിടാൻ മോഹമായ്

നിന്നുടെ ചുണ്ടിലെ പുഞ്ചിരി കാണുവാൻ
വെമ്പൽകൊള്ളുന്നിതാ മാനസം തുഷ്ടിയാൽ

ചേലൊത്ത മഞ്ഞപ്പുടവയും ചുറ്റി നീ
യശോദതൻകണ്ണിലുണ്ണിയായെത്തിയോ?

ആനന്ദനർത്തനമാടുന്ന കേകിതൻ
പീലികൾ നിൻ ശീർഷമലങ്കരിക്കുന്നു

നിൻ്റെ വികൃതികൾ കണ്ടുവിടർന്നതാം
വൃന്ദാവനത്തിലെ പൂക്കൾ ചിരിക്കുന്നു

വെണ്ണ കവർന്നുകൊണ്ടോടുമീ കണ്ണൻ്റെ
ചുറ്റിലും സഖന്മാരെത്തി നുകർന്നിടാൻ

അമ്പാടിതന്നിലെ പൈക്കളും കണ്ണൻ്റെ
ലീലാവിലാസങ്ങളാൽ ഹർഷോന്മത്തരായ്

ഗോപികമാർ ചുറ്റും നർത്തനമാടുവാൻ
കണ്ണൻ്റെ ചാരെയണയുവാൻ വെമ്പുന്നു

തോഴിയാം രാധതൻ കരം ഗ്രഹിച്ചിടാൻ
കണ്ണനിന്നാശിപ്പാനെന്തിതു കാരണം ?

കണ്ണാ നീ മായല്ലേയെന്നുടെ മാനസ-
പ്പൊയ്കയിൽ നീന്തുവാൻ വന്നിടൂ മോദമായ്

എൻ ശോകമാറുവാൻ നീ കനിഞ്ഞീടുവിൻ
നിൻ ഹാസമെന്നിലും തൂകിവന്നീടുവിൻ

വൃത്തം -കാകളി
ഗീതാഞ്ജലി
14-9-2025
******************************************