ഓർമ്മയിലെ ഗ്രാമം
***************
ചികയുന്നു മനം നിറയ്ക്കുന്നൊരോമൽ
നിനവിൻ ചില ചിന്തുകൾ മോഹനം ഹാ
പകരും നിറശോഭയെൻഗ്രാമഭംഗി
കുളിരും മനമിന്നുമോർത്താൽ നമിക്കും
ഒരു പയ്യിനെ മേച്ചുകൊണ്ടെൻ പറമ്പിൽ
വിഹരിച്ച ദിനങ്ങളിന്നും കെടാതെ
മനതാരിലിതാ വിടർന്നിന്നുമാർദ്രം
കുസൃതിത്തരമോടെ പിന്നിട്ട ബാല്യം
കശുമാവിലെ കമ്പിലൂഞ്ഞാലുകെട്ടി
കളിയാടുകവേണമെൻ കൂട്ടരൊത്തു
മഴ പെയ്യവെ വള്ളമുണ്ടാക്കി ഞങ്ങൾ
നടുമുറ്റമതിൽ കളിക്കുന്നതോർപ്പൂ
മഴതൻ ശ്രുതിചേർന്നു താളം മുഴക്കി
നിപതിക്കെ കുടങ്ങളിൽ ധാരയായി
അതു കേൾക്കെ മനം തുടിക്കുന്നു ചേലിൽ
നടനത്തിനൊരുങ്ങിനില്ക്കുന്നു ഞാനും
മതിലില്ലൊരു വീടിനും ചുറ്റുമാർക്കും
കുശലം പറയും സഹായിക്കുമൻപാൽ
മതവും കുലവും ചെറുത്തോരയൽക്കാർ
നിറയും മമദേശമെങ്ങും പ്രകാശം
തൊടിയിൽ ചികയും പിടക്കോഴിതൻ്റെ
ചിറകിന്നടിയിൽ കരുത്തോടെ മക്കൾ
കിണറിൻ കരയിൽ കുളിക്കും കിടാങ്ങൾ
തുളസിത്തറയും നിറം ചാർത്തി ഭംഗ്യാ
പല കാഴ്ചകളും മറഞ്ഞിന്നുപോയി
ഒരു തുമ്പമലർ സമാനം മറഞ്ഞു
പല ബാലകരും കളിച്ചിട്ട മുറ്റം
തിരയുന്നവരെ പ്രതീക്ഷാസമേതം
വൃത്തം:സമയപ്രഹിത
ലക്ഷണം:സമയപ്രഹിതയ്ക്കിതാസംസയംയം
താളം:തതതം തതതം തതംതം തതംതം
ഗീതാഞ്ജലി
14-10-2025
****************************************
