വരവേല്പ്

 വരവേല്പ് 

"" "" "" "" "" 

താരകജാലമതാ തിരി താഴ്ത്തി,
ഭാസ്കരനെത്തിയ പാതയിലിന്നും
മോഹനരൂപിണിയീ പുതുവർഷം
വന്നിടുമോ ഒളിതൂകിടുവാനായ്?

പൊൻനിറമാർന്നിതു സുന്ദരവാനം
കോകിലകൂജനമെങ്ങുമുണർന്നു.
സ്വാഗതമോതിടുവാൻ സുമജാലം
വർണ്ണവിരുന്നു നിറച്ചിതു പാരിൽ.

കാതരമാമൊരു നീള്‍മിഴി നീട്ടി,
വ്യാധിയണഞ്ഞിഹ പോയൊരു വർഷം
നീറുമൊരോർമ്മയുമായുണരുന്നു
ഭീതിയുയർത്തിടുവാനൊരു രോഗം

നീങ്ങിടുമോ ദുരിതം പുതുവർഷം
വന്നിടുമോ ദ്യുതി ലോകമിതെങ്ങും?
ശാന്തി പരന്നിടുമെന്നൊരു തോന്നൽ
മാനസവാടിയിലാശയുണർത്തി

കാന്തിയെഴുന്നൊരു ഹാസമിതെങ്ങും
ചാർത്തിടുവാൻ  വരവേല്പിനൊരുങ്ങാം
വർണ്ണമനോഹരദൃശ്യമതെങ്ങും
തങ്ങിടുവാൻ പുതുവർഷദിനത്തിൽ
(വൃത്തം - ദോധകം)
"" "" "" "" "" "" "" "" "" "" "" "" "" "" "" "" "" "" ""
ഗീതാഞ്ജലി
31-12-2020