കേരളപ്പിറവി

കേരളപ്പിറവി
"" "" "" "" “"" "" ""
മലയാളനാടിൻറെനൽപ്പിറന്നാൾദിനത്തിലെൻ
മുല്ലപ്പൂമാലയായൊന്നൊരുക്കുന്നൊരുകാവ്യം

തിരുമുൽക്കാഴ്ച്ചഞാനും നേരുവാനീദിനത്തിൽ
തിരുവോണംപോലിന്നാഘോഷിച്ചീടുവാനായ്

കൃശഗാത്രയായെൻ കേരളമൊരുങ്ങുന്നു
കൃതിയായിന്നുവന്നു കൃതശോഭയുംതൂകി!

തൂലികത്തുമ്പിൽത്തുളുമ്പുവാനെൻ ചേതനയും
തുള്ളുന്നീ നല്ലനാളിൽ നൈവേദ്യമായർപ്പിക്കാൻ

തുഞ്ചൻറെ കിളിപ്പാട്ടും കുഞ്ചൻറെ തുള്ളലുമായ്
തുന്നുന്നൂ നിൻമേന്മകൾ മലയാളമേ കേൾക്ക

മാതൃഭാഷയുംചൊല്ലിപ്പഠിച്ചീടുമോ നിങ്ങൾ
മനം നിറഞ്ഞു കാവ്യം രചിക്കൂ പൈതങ്ങളേ!

മനംമയക്കുന്നൊരാ പ്രകൃതിവൈവിദ്ധ്യത്തെ
മറക്കാതിരിക്കുക ചൂഷണം ചെയ്തീടാതെ

പച്ചവിരിച്ചനെല്ലിൻപാടങ്ങളുണരട്ടെ
പൊന്നിൻകതിർക്കുലകൾ നർത്തനമാടീടട്ടെ

തെച്ചിയും ചെമ്പനീരും തുമ്പയും കായാമ്പൂവും
തോഴരായിന്നുചേലിൽ തെന്നലിലാടീടുമ്പോൾ

മാവേലിനാടിനെ നാം പുനർജ്ജീവിപ്പിച്ചീടാൻ
മാമകസോദരരേ ഒന്നിച്ചൊന്നണിചേരൂ!

മനോഹരാംഗിയാമീ കേരളപ്പൂങ്കാവനേ
മന്ദമായ് വീശീടട്ടേ സ്നേഹത്തിൻ സുഗന്ധവും

അന്യഭാഷകളെയും സൗഹൃദത്തോടെ കാണാം
അമൃതായ്ക്കരുതീടാം ലോകവും കുടുംബമായ്!
"""""""""""""""""""""""""""""""""""""""""""""""""""""""""""""""""
ഗീതാഞ്ജലി
1-11-2017