ആഴക്കടൽ തേടി

ആഴക്കടൽ തേടി
"" "" "" "" "" "" "" "" "" "
സ്നേഹം കിനിയുന്നൊരാഴക്കടൽ തേടി
സ്വാർത്ഥതയാൽകത്തും ഉലകം ത്യജിച്ചു ഞാൻ
സാരമായുടഞ്ഞൊരാ കിനാവിൻ കുംഭത്തിൽ
സ്വച്ഛമായൊഴുകുവാൻ നേരിൻറെ മാർഗ്ഗത്തിൽ

കാരുണ്യമറ്റൊരാ ജീവിതതീരത്തിൽ
കഴുകന്മാർ റാകിപ്പറക്കുന്നു ചുറ്റിലും
കൂർത്തനഖങ്ങളാൽ പിന്നെയും പിന്നെയും
കീറിമുറിക്കുവാൻ ഹൃത്തടമാഴത്തിൽ!

അലിവിൻകരങ്ങളെന്നോതിയെൻ ചാരത്തായ്
അണഞ്ഞൊരാ തിരകളുമെന്നെവിട്ടകന്നുപോയ്
അവിശ്വാസത്തിൻ കരാളഹസ്തങ്ങളാൽ
ആഴിയിന്നാഴത്തിൽ തള്ളിയിട്ടിന്നിതാ!

ആഴക്കടലിന്നാഴത്തിൽ മുങ്ങീടുവാൻ
ആശിച്ചെന്നാത്മാവൊരു ശംഖിലൊളിക്കുവാൻ
ആശ്വാസഗീതമായി, വ്രണിതമാം ഹൃത്തിലെ
ആഴമളക്കാത്ത സ്നേഹത്തിൻനാദംപോൽ!
"""""""""""""""""""""""""""""""""""""""""""""""""""""""""""""""""""""""
ഗീതാഞ്ജലി
25-10-2017