തിരുപ്പിറവി

തിരുപ്പിറവി
""""""""""""""""
സ്നേഹത്തിൻ ദീപമായിനിയും വരിക
സ്നേഹക്കടലായി പാരിടം നിറയുക
എളിമനിറച്ചെൻറെ മാനസപ്പുല്ക്കൂട്ടിൽ
തെളിമയോടിന്നണയുക  സദ്ഗുരു!

യേശുവിൻ ജനനത്തിരുനാളിലിന്നു
ശിശുവിൻ നൈർമ്മല്യഭാവത്തോടെ
ഹൃദിയലങ്കരിച്ചീടാം സ്നേഹത്താലേ
മൃദുസ്മേരം പകരുന്ന വാക്കിനാലേ!

മാനസമുരളിയിൽ മീട്ടുന്നു ഞാനിന്നു
സാനന്ദമറിഞ്ഞൊരു സുവിശേഷങ്ങൾ
കാലിടറാതെന്നെ കാത്തൊരാവഴികാട്ടി
കാലങ്ങളേല്പിച്ച പ്രഹരങ്ങൾക്കിടയിലും

അന്യന്റെ ദുഃഖങ്ങൾ സ്വന്തമാക്കീടുവാൻ
ധന്യമായ് തീർത്തിടാനവനിയിൽ ജീവിതം
ഒരുപൊൻതാരമായെൻവഴിത്താരയിൽ
വരികയെൻ ഹൃത്തിലെ തിരിനാളമായി!

പുല്ക്കൂട്ടിൽപിറന്നൊരു മിശിഹാതൻറെ
നൽവചനങ്ങളെ കാറ്റിൽപ്പറത്തുന്നോർ
മണിമന്ദിരങ്ങളിലാഘോഷത്തിമിർപ്പിൻറെ
പണക്കൊഴുപ്പായ് മാറ്റുന്നു തിരുപ്പിറവി!

വരിക നീയൊരു കൊടുങ്കാറ്റായി വീണ്ടും
നാരായവേരു പിഴുതെറിയാനധർമ്മത്തിൻ
ഉലകം നിയന്ത്രിക്കും വിദ്വേഷവിഷങ്ങളെ
ഉലച്ചീടുവാനെൻവിരൽത്തുമ്പിലക്ഷരമായി!
’''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''
ഗീതാഞ്ജലി
25-12-2017