പ്രണയവർണ്ണങ്ങൾ

പ്രണയവർണ്ണങ്ങൾ
'''''''''''''''''''''''''''''''''"""
വരുമോ മമ പ്രാണനാഥനേ
പ്രണയോന്മുഖനായി വീണ്ടുമീ
സഖിതൻ പ്രിയകാവ്യമായി നീ
കുളിരുന്നൊരു ചാറ്റലായി നീ

ദുരിതം നിറയുമ്പൊഴും ഹൃദേ
വരമായണയുന്നു നിൻ സ്മൃതി
മനതാരിലനന്യപ്രേമമായ്
കുടികൊള്ളുകയെന്നുമേ സഖേ

പ്രണയം പലവർണ്ണമായിതാ
പടരുന്നതു ഞാനറിഞ്ഞിതാ
മഴവില്ലഴകിൽ മനോഞ്ജമായ്
ഒരു ഗാനമതിൻ പ്രവാഹമായ്

വിരിയൂ മമ മാനസത്തിലി-
ന്നൊരു പുഷ്പമതായി നീയിനി
വനജ്യോത്സ്നയതായിമാറി ഞാൻ
പ്രണയാതുരയായി പൂവിടാം

കനവിൻ പടിവാതിലിൽ വരൂ
കരളിൽ നവമോഹമായി നീ
പടരൂ മമ ജീവനിൽ നിലാ-
വൊഴുകുന്നതുപോലെയെന്നുമേ
(വൃത്തം-സുമുഖി)
10-2-2019