മഴത്താളം

മഴത്താളം

'''’'''''''''''’'’''''''''''''''''''''''

ആർപ്പോയീർപ്പോ കേൾക്കുന്നുണ്ടേ

മണ്ണും വിണ്ണും തുള്ളുന്നുണ്ടേ

ധിംധിം ധിംധിം കൊട്ടുന്നുണ്ടേ

മാരിക്കാറാം ചെണ്ടക്കാരൻ

ഓടിൻമീതേ വീഴുന്നുണ്ടേ

ആടിപ്പാടീ വെള്ളച്ചാറ്റൽ

പൂരക്കാവിൽ മേളംപോലേ

ഘോഷിച്ചാർത്തൂപെയ്യുന്നല്ലോ

മാരിപ്പെയ്ത്തിൽ ചോരുന്നുണ്ടേ

ഓലക്കൂരക്കീഴിൽ വെള്ളം

കാർമേഘത്തിൻ രോഷം തീർക്കാൻ

മിന്നൽപ്പെയ്ത്തിൻ പാരാവാരം

മണ്ണിൽനീളേ ചാലും തീർത്താ

ഓളങ്ങൾതൻതാളത്താലേ

നൃത്തം വെച്ചീടുന്നേ മാരി-

പ്പെണ്ണാവേശത്താലേ ഹൃദ്യം!

ഉന്മാദത്താൽ വീശുന്നുണ്ടേ

കാറ്റിൻ കൈകൾ വീണ്ടും വീണ്ടും

വൃക്ഷങ്ങൾതൻ ശാഖിക്കൈകൾ

കൂടെപ്പാടിയാർക്കുന്നുണ്ടേ!

(വൃത്തം-വിദ്യുന്മാല)

''''''''''''’'''''''''''''''''’'''''’'''''''''''''''''''''''''''’'''''''''''''''''''''

ഗീതാഞ്ജലി

5-2-2019