ഓർമ്മകൾ
"""""""""""""""""""
വഞ്ചിപ്പാട്ടിന്നീണംമൂളി കുണുങ്ങിയെത്തുംതെന്നൽ
നീലനിശീഥിനിതൻറെ മനംകവർന്നു
നിന്റെ കുറുനിരകളും കുണുങ്ങിയാടിചെമ്മേ
നമ്മുടെ കനവുകൾപോലെ താളത്തിൽ
നിന്റെ കവിതകളിലന്നു വസന്തങ്ങൾപെയ്തിരുന്നു
നിൻകപോലങ്ങളിൽ സന്ധ്യ ചിത്രംവരച്ചു
ആറ്റുതോണിപോലെ നമ്മൾ സ്വശ്ചന്ദമൊഴുകിനീങ്ങി
ആറ്റുനോറ്റുനമ്മൾനെയ്ത സ്വപ്നങ്ങൾപോലേ
നിൻറെകണ്ണിൽ തെളിഞ്ഞൊരാ താരകളെന്നോടുചൊന്ന
നിറമാർന്ന കഥകളിലന്നലിഞ്ഞല്ലോ ഞാൻ
ആറ്റിനക്കരെയെന്നു നിൻറെ നിഴൽ നീങ്ങിപ്പോയി?
ആശകൾതൻപൂക്കാലങ്ങളെങ്ങുമറഞ്ഞു?
ഇന്നുമെൻറെ വഞ്ചിയിൽ ഞാൻ നിന്നെത്തേടിയലയുന്നു
ഇന്ദീവരങ്ങളെൻമനസ്സിൽ പൂക്കുവാൻവീണ്ടും!
ആശകൾ നിരാശകൾക്ക് വഴിമാറിപ്പോകുമ്പോളും
ഒരു പവിഴപ്പുറ്റുപോലെ കാത്തിരിപ്പൂ ഞാൻ!
നിൻറെയോർമ്മകളോയെന്നെ പിന്തുടരുന്നല്ലോ നിത്യം
ഘനഭരമാനത്തൊരു മഴവില്ലായി!
തുളുമ്പുന്നയോർമ്മകളോ നറുമുത്തുകളായി മണ്ണിൽ
നിലവിളിയോടെ വീണു പതിച്ചിടുന്നു!
''’'''''''''''''''''''''''''''''''''''''''''''''''''''''''''''''''''''''''''''''''''''
ഗീതാഞ്ജലി
14-6-2018
No comments:
Post a Comment